Posted by Steve Muhlberger, June 30, 2001

[1388]

    In þis forsaide parliament, and þe xij 3ere of King Richarade3 regne, he let crye and ordeyne generalle Iusti3e, þat is called a turnement, of lorde3, kny3tis and skquiers.  And þese Iustes & turnement were holden at London in Smithfelde, for alle maner of strayngers, of what londe & cunctre þei were, and þidir þei were ri3t welcome; and to hem and to alle oþer was holden opon housholde and grete ffestis; and also grete yftis were yeue to all maner of straungers.   And þay of the kinges syde were alle of on sute: her cotis, her armyour, schelde3, & her hors & trapure, alle was white hertis, with crowne3 about her nekkis, and cheyne3 of golde hagnyng þere vp-on, and þe croune hangyng lowe before þe hertis body; þe which hert was þe kingi3 lyveray þat he yaf to lorde3 & ladie3, kny3tis and skquiers, for to know his housholde from oþer peple.  And at þis first comyng to her Justes, xxiiij ladie3 ladde þese xxiiij lorde3 of þe Garther with cheynes of goolde, and alle yn þe same sute of hertis as is afore sayde, from þe Tour on hors bak þrou3 the cite of London yn-to Smythfelde, þere þe Iustes schulde be do. And þis fest and Iustes was holde general, and to all þo þat woulde come, of what land or nacion þat euyr he were; and þis was holde duryng xxiiij daye3, of of the kinge3 owne cost; and þese xxiiij lorde3 to answere to alle maner of pepil þat woulde come þidir.  And þedir come þe Erle of seint Poule of Fraunce, and mony oþer worthi kny3tes with hym of divers parteys, fful welle arayed.  And out of Holand and Henaude come þe Lorde Ostrenaunde, þat was þe Duke3 sone of Holande, & mony oþer worthi kny3tes with hym, bothe of Holand and Henaude fulle welle arayede.  And whenne þese feste and Iustes was do and endid, þe King þanked þese st[r]ayngers and yaf ham mony grete yeftis; and and þanne þei token hir leue of þe King & of oþer lorde3 and ladie3, and went hom ayen yn-to her owne countre, with grete love and & moche þanke.

...
[p. 348; 1393]

And yn þe xvij yere of his regne, certeyne lorde3 of Scotlande com yn-to Englonde to get worschip, as by feet of arme3: þese were þe persons:  þe Erle of Marre, and chalanged the Erle Marchall of Englelonde to Iuste with hm certeyn poynte3 on horsbak with scharpe speis.  And so þai redyn togadir, as ij worthi kny3tis & lordes, certayne cours, but not þe fulle chalange þat þe Scottysche Erle made; for bhe was cast both hors and man, and ij of his rybbis brokyn with þe falle; and so he was born out of Smythfelde, hom yn to his Inne; and with-ynne a litil while aftir-ward he was caried homwarde yn a liter; & atte York he deied.  And Ser William Darell, kny3t, and banerrer of Scotland, made anoþer chalange with Sire Piers Courteney, kny3t; and þe Kingdes banerrer of Engelonde, of certeyne course3 hit on horsbak yn þe same ffelde.  And whanne he hed y rede certeyn cours hit, and saw he my3t not haue the better, yaf it ouyr, and wolde no more of his chalang, and turned his hors and rode hom vnto his owne in.  And one Kocborne, squier, of Scotland, chalanged Sir Nicholl Hawberke, kny3t, of certeyne cours, hit with scharp speris on horsbak; and redyn .v. cours hit togadir; and att every cours þe Scotte was cast doun, both hors and man, and þus our Englisch lorde3 -- þankyd be God ! -- had þe felde.